كام مرة شوفت ف حياتك حد متخيل ان مفيش منه اتنين وانه عبقري زمانه ؟ او كل افعاله هي اللي صح والباقي مجرد مساعدين ليه او مسخرين لخدمته ؟
بيتعامل مع الناس بكُبر و مبالغة في تعظيم النفس ؟ قول معايا بسم الله الرحمن الرحيم ..
{أَلَمْ تَرَ إِلَى الَّذِي حَاجَّ إِبْرَاهِيمَ فِي رَبِّهِ أَنْ آتَاهُ اللَّهُ الْمُلْكَ إِذْ قَالَ إِبْرَاهِيمُ رَبِّي الَّذِي يُحْيِي وَيُمِيتُ قَالَ أَنَا أُحْيِي وَأُمِيتُ قَالَ إِبْرَاهِيمُ فَإِنَّ اللَّهَ يَأْتِي بِالشَّمْسِ مِنْ الْمَشْرِقِ فَأْتِ بِهَا مِنْ الْمَغْرِبِ فَبُهِتَ الَّذِي كَفَرَ وَاللَّهُ لا يَهْدِي الْقَوْمَ الظَّالِمِينَ}.
قصة النمرود وسيدنا ابراهيم اكيد عارفينها لكن هقول ملخص سريع ليها . مبدئيا القصة مرتبطة باللي هتكلم عنه المرة دي ف اقرأ معايا ، مش هتندم .
ملك بابل اسمه النمرود بن كنعان -أو النمرود بن فالح - حكم بابل لمدة 400 سنة وكانت كلها ظلم و جهل . النمرود دخل في مناظرة مع سيدنا ابراهيم بسبب انه كان بيدّعي الربوبية ف لما قال سيدنا ابراهيم ربي الذي يحيي ويُميت رد عليه النمرود وقال أنا الذي احيي واميت والرد دا كان مبالغة في تعظيم كيان النمرود العبد الضعيف و انكار لوجود الله سبحانه وتعالي و دليل علي مرض النمرود بـ "Megalomania - جنون العظمة "
د.عدنان ابراهيم في خطبة من الخطب اللي كان بيلقيها قال ان افضل طريقة لعلاج الشخص المريض بجنون العظمة المسايرة لحد ماتوصل لطريق مسدود لأكاذيبه .
ف سيدنا ابراهيم قال للنمرود ان ربنا جعل ان الشمس بتشرق من جهة الشرق ف انت خليها تشرق من الغرب .
وطبعا احنا عارفين اخر قصة النمرود انه مكانش بينام الا بضرب راسه بالجزم عشان البعوضة اللي عاشت جواه .
مين تاني كان عنده المرض دا ؟ علماء النفس بعد ما حللوا بعض الشخصيات المعروفة لقو ان افضل مثال لجنون العظمة كان الرئيس ال37 للولاايات المتحدة "ريتشارد نيكسون" وبعده القذافي وبعده صدام حسين .
بعد ما اتكلمنا عن اللي كان عندهم المرض دا نتكلم عن المرض نفسه بشكل مختصر ..
الميغالومانيا او وسواس العظمة في اغلب الحالات بيكون من اعراض الشيزوفرينيا او الاضطراب الوجداني ثنائي القطب بيكون المريض عنده وهم كبير انه شخصية مهمة جدا جدا في المجتمع ف بيعتقد انه الرئيس الفعلي للبلد والرئيس اللي بيطلع في التليفزيون دا ممثل مش اكتر . او انه عنده قرايب من الوزراء او احيانا بيوصل المريض انه بيدّعي النبوة او الربوبية .
ممكن يكون سبب المرض وراثي عشان لما العلماء بحثو في المرض اكتشفو ان أسر مرضي الميغالومانيا كان عندهم اضطرابات عقلية وسلوكيات مريضة وممكن متكونش الاسباب وراثية لكنها بتنشأ من الأسرة زي اضطراب الجو الاسري و التسلط او التوترات والضغوط الزيادة او ان الشخص يعيش في بيئة انعزالية ودا هيساعده من التخيلات والاوهام بعظمته
زي ما قولت ان المرض في الغالب بيكون من اعراض الفصام او اضطراب ثنائي القطب ف احسن الحلول ان المريض يتم عرضه علي دكتور نفسي يشخص درجة خطورة المرض و حجزه في مستشفي امراض عقلية ونفسيه لو كان يلزم .
https://www.youtube.com/watch?v=N3EUReccGcA
دا فيديو 13 دقيقة ل د.عدنان ابراهيم بجد هتتمني انهم ميخلصوش بيوضح فيه الشخصية المصابة بجنون العظمة و قصة النمرود و في الاخر بيتكلم عن الشخصية النرجسية ..ثواني كدا ايه النرجسية دي كمان؟
الشخصية النرجسية هي الشخصية الانانية اللي بتحب نفسها بل بتعشقها ، شخصية تتسم بالغرور والتعالي والكسب علي حساب الاخرين .
احد علماء النفس " سيجموند فرويد " استخدم قصة نركسوس ابن الإله كيفيسيا اللي كان مغرور بشكل كبير و بيحب نفسه وكان بيتجاهل أي حد بيكرهه ف الإلهة نمسيس لاحظت تصرفه الغريب و راحت بيه لبحيرة و قالتله يشوف انعكاس صورته ووقع في حب نفسه ومعرفش يسيب انعكاس صورته وفضل يبص لنفسه في البحيرة لحد ما مات .
و في اقوال تانية ان نركسوس صابته لعنة الالهة افروديت علشان كسر قلب إيكو وقالها انه مبيحبهاش . ودي حاجة مش هتكلم عليها عشان قصة طويلة .
وفي أقاويل ان زهرة النرجس اتسمت بالإسم دا كتعبير رمزي عن زهو الانسان اللي بيختفي بمرور الوقت ، ودا عشان الزهرة بتنمو الصبح و بتدبل بسرعة.
النرجسية سببها ان الشخص شايف نفسه مثالي وبكدة لغي وجود فكرة انه ممكن يغلط او يكون تفكيره كله غلط اصلا . بناءّ علي الكلام دا قال "جانين شاسجيت" ان النشوة النرجسية تتطلب التقاء الأنا والأنا المثالية مما يذيب الأنا العليا -ممكن اتكلم فيهم ف وقت تاني -
سؤال بقا . هل جنون العظمة والشخصية النرجسية حاجة واحدة؟
د.عبد الناصر عمر قال ان الميغالومانيا حالة مرضية لكن الشخصية النرجسية دي سمة شخصية . الميغالومانيا بتكون احد اعراض الفصام او اضطراب ثنائيي القطب وبتكون فترة مؤقتة وبعد شفاء الشخص من المرض بيرجع انسان عادي ويعرف انه انسان عادي لكن الشخصية النرجسية حالة مستمرة في الشخص من ولادته حتي موته وبتكون صفاتها ظاهرة في مرحلة الطفولة لما يكون الطفل مش عاوز يشارك العابه مع اطفال تانية او محدش يشاركه ف اوضته او يكون اناني مع اخواته واهله و الأسرة هي السبب ان العقدة النرجسية بتزيد مع تقدم العمر .
وقبل ما ننهي الكلام نعرف مشاهير النرجسية وهما صدام حسين وهتلر ودونالد ترامب وشارلي شابلن
والمتنبي اتقال انه نرجسي بسبب مدح نفسه في شعره زي بيت الشعر دا " أمط عنك تشبيهي بما وكأنما فما أحد فوقي ولا احد مثلي " .
